நீங்கள் தேடியது "கொள்ளையன் கால் முறிந்தது"

சேலம்:

சேலம் ஊத்துக்காடு வெடிக்கல்பாறை பகுதியை சேர்ந்தவர் கபாலி என்ற சுப்பிரமணி (வயது 24). பிரபல கொள்ளையனான இவர்  சேலத்தில் தொடர் திருட்டு மற்றும் வழிப்பறியில் ஈடுபட்டு வந்தார். இதனால் அவர் மீது அம்மாபேட்டை, சூரமங்கலம், கன்னங்குறிச்சி, மல்லூர் உள்பட பல போலீஸ் நிலையங்களில் வழிப்பறி வழக்குகளும், ஒரு கொலை வழக்கும் நிலுவையில் உள்ளது. இதற்கிடையே கடந்த சில நாட்களுக்கு முன்பு சேலம் செவ்வாய்ப்பேட்டை பகுதியை சேர்ந்த ஒரு பெண்ணிடம் செயின் பறித்ததாக கூறப்படுகிறது. 

இது குறித்து செவ்வாய்ப்பேட்டை போலீசார் வழக்குபதிவு செய்து அவரை தேடி வந்தனர். இந்த நிலையில் நேற்றிரவு ஊத்துக்காடு வெடிக்கல் பாறை பகுதியில் கபாலி பதுங்கியிருப்பதாக செவ்வாய்ப்பேட்டை போலீசாருக்கு ரகசிய தகவல் கிடைத்தது. உடனே இன்ஸ்பெக்டர் கிருஷ்ணமூர்த்தி தலைமையிலான போலீசார் அங்கு விரைந்து சென்று தேடுதல் வேட்டையில் ஈடுபட்டனர்.

அப்போது ஒரு வீட்டில் பதுங்கி இருந்த கபாலி ஓட்டம் பிடித்தார். போலீசார் அவரை பின் தொடர்ந்து விரட்டி சென்றனர். இதனால் பயந்து போன கபாலி நிலை தடுமாறி கபாலி கீழே விழுந்தார். இதில் அவரது  இடது காலில் முறிவு ஏற்பட்டது. வலியால் அலறி துடித்த அவரை மீட்டு சேலம் அரசு ஆஸ்பத்திரியில் சிகிச்சைக்கு சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. 

இது குறித்து செவ்வாய்ப்பேட்டை போலீசார் விசாரணை நடத்தி வருகிறார்கள். இந்த சம்பவம் நேற்றிரவு அந்த பகுதியில் பெரும் பரபரப்பை ஏற்படுத்தியது.